Շատ կերակրող մայրեր դեմ են առնում պտուկների ճաքելու խնդրին, որը բավականին ցավոտ երևույթ է:
Խնդրից խուսափելու համար մանկաբարձ Սիրանուշ Պողոսյանը խորհուրդ է տալիս կերակրող մայրերին ուշադրիր հետևել, որ կերակրելիս երեխայի դիրքը ճիշտ լինի և կուրծք ուտելիս փոքրիկը բռնի ոչ թե պտուկը, այլ պտուկի շրջակա օղակը: Պետք է ուշադիր լինել, որ երեխան բերանը լայն բացի, որպեսզի ներքևի շուրթը չծալվի:
Ըստ Պողոսյանի` պտուկների ճաքելու պատճառ կարող են լինել նաև հաճախակի լվացումները, հատկապես օճառով. այդպիսով հեռացվում է պտուկների և հարպտկային մաշկի բնական ճարպը, իսկ չոր մաշկն ավելի հեշտությանբ է վնասվում և ճաքճքում:
«Հարկավոր է հետևել, որ պտուկները կերակրելուց հետո թաց չմնան,-խորհուրդ է տալիս մասնագետը: -Կրծկալը կոճկելուց առաջ փափուկ կտորով պետք է զգուշորեն չորացնել կուրծքը: Անհրաժեշտ է պտուկները չորացնել բաց օդում` արևի տակ, կամ էլեկտրական վարսահարդարիչով»:
Սիրանուշ Պողոսյանը պտուկների ճիշտ խնամքի համար մի քանի խորհուրդներ է տալիս.
- Կերակրելուց առաջ մի փոքր կաթ կթել, որպեսզի կրծքերը փափկեն, և երեխան կարողանա կրծքի մոտ հարմար դիրք գրավել:
- Կերակրելուց անմիջապես առաջ կրծքին զգուշորեն սառուց դնել:
- Երեխային բռնելու որևէ բան առաջարկելու համար պտուկների վրադիրներ օգտագործել: Սակայն հենց կաթը սկսի հոսել, հեռացնել վրադիրը, որպեսզի երեխան չընտելանա: Վրադիրով կերակրելը մեծ լարում է պահանջում և անարդյունավետ է:
- Յուրաքանչյուր կերակրելուց հետո վրադիրը ախտահանել:
- Չոր մաշկ ունեցող կանանց պտուկները կարող են ճաքճքել նունիսկ այն ժամանակ, երբ երեխան ճիշտ է ծծում կուրծքը: Խորհուրդ չի տրվում օգտագործել քսուքներ, յուղեր: Կարելի է օգտագործել լանոլին:
- Եթե երեխայի բերանի լորձաթաղանթը ախտահարված է կաթնախտով, կարող են վարակվել նաև մոր պտուկները: Կաթնախտի հարուցիչները` սնկերը, երեխայի բերանում առաջացնում են սպիտակ փոքրիկ կետիկներ, որոնք հեշտությամբ չեն մաքրվում: Այդ դեպքում և’ մայրը, և’ երեխան կարիք ունեն բուժման:
- Վնասվելու ավելի հազվադեպ պատճառ են ալերգիկ մաշկաբորբերը, որոնք կարող են առաջանալ օճառի, քսուքների, կրծկալի գործվածքի նկատմամբ գերզգայունության հետևանքով:
Եթե նշված խորհուրդները կիրառելուց հետո էլ պտուկները չեն բուժվում, պետք է դիմել մասնագետի: Նա կստուգի` արդյոք երեխան ճիշտ է ծծում կուրծքը, կօգնի գտնել կերակրելու ճիշտ եղանակը, եթե անհրաժեշտ է`կնշանակի բուժում սնկային ախտահարման դեմ:
Լիանա ՀՈՎՀԱՆՆԻՍՅԱՆ
Թեմայի մասին տես նաև`
Կրծքով կերակրման դեպքում հանդիպող սխալները և դրանց հետևանքները
Կրծքով կերակրելու առավելությունները մայրիկի համար
Ինչպես կրծքով ճիշտ կերակրել. մանկաբույժի խորհուրդները
