Ռոտավիրուսային հիվանդությունից խուսափելու միակ ուղին ճիշտ ժամանակին պատվաստվելն է. մասնագետ

«Ռոտավիրուսային ինֆեկցիան խնդիր է եւ զարգացած, եւ զարգացող երկրներում: Ռոտավիրուսային հիվանդությունից երեխաներին պաշտպանելու լավագույն միջոցը հիվանդության դեմ պատվաստումներն են»,-ասաց նա: Սահակյանը նշեց, որ ԱՀԿ-ի տվյալներով Հայաստանում մինչեւ հինգ տարեկան 40-100  երեխա կարող է մահանալ ռոտավիրուսային հիվանդությունից: Վաղ հասակի երեխաների մոտ ռոտավիրուսային հիվանդությունը հիմնականում սկսվում է ջերմությամբ եւ փսխումով, որին հաջորդում է լուծը:

Վիրուսը վնասում է բարակ աղիների էպիթելի բջիջները, որի հետեւանքով ջուրը եւ սննդանյութերը աղիներից չեն ներծծվում օրգանիզմ: Երեխաների մոտ անհետանում է սնունդ եւ ջուր ընդունելու ցանկությունը: Ռոտավիրուսային հիվանդությունը հեշտությամբ փոխանցվում է վարակված երեխայից առողջին, նույնիսկ` մեծահասակներին:

Համաշխարհային շուկայում հայտնի է ռոտավիրուսային երկու պատվաստանյութ` ՌոտաՏեք եւ Ռոտարիքս: Հայաստանի Հանրապետությունում ներկրվում է Ռոտարիքս պատվաստանյութը: Ռոտավիրուսային պատվաստումները կատարվում են երկու դեղաչափով` առաջին դեղաչափը 6 շաբաթական երեխայի համար, երկրորդը` 12: Երկու դեղաչափերի միջեւ պետք է պահպանվի առնվազն 4 շաբաթ տեւողություն: Ի տարբերություն մյուս պատվաստումների, որոնք կարող են ուշ կատարվել, «Ռոտա» պատվաստումները պետք է կատարվեն ժամանակին, այլապես երեխան անպաշտպան կմնա:

Ժամանակին արված պատվաստումները նպաստում են դիարեայով հիվանդությունների կտրուկ նվազելուն:

Առողջապահության նախարարությունը փոքր պոլիկլինիկաները կվերազինի պատվաստանյութի պահման համար նախատեսված սառնարաններով: Կիրականացվեն նաեւ իրազեկման միջոցառումներ. կբաժանվեն  հուշաթերթեր, տեղեկատվական գրքեր: Իմունիզացիայի ծրագիրը կունանա նաեւ իր ինտերնետային էջը, որտեղ ցանկացողները կարող  են ուղղել իրենց հուզող հարցերը: