Հայաստանում բնակվող միգրանտ ընտանիքների դպրոցահասակ երեխաները հնարավորություն կունենան անվճար սովորել հայերեն։
Այս նախաձեռնությունն իրականացնում է ՀՀ կրթության, գիտության, մշակույթի և սպորտի նախարարությունը՝ դրամաշնորհային ծրագրի շրջանակում՝ «Big Mind» ուսումնական կենտրոնի միջոցով։
Նպատակն է աջակցել այն երեխաներին, ովքեր նոր են տեղափոխվել Հայաստան, չունեն բավարար հայերեն իմացություն կամ դժվարանում են հարմարվել դպրոցի ուսումնական ծրագրին։
Ովքե՞ր կարող են մասնակցել դասընթացներին
- Հայերենի անվճար դասընթացներին կարող են մասնակցել՝
- Միգրանտ ընտանիքների 4-9-րդ դասարաններում սովորող երեխաներ
- Հայեր և օտարազգիներ, որոնք տեղափոխվել են Հայաստան և չունեն հայերենի բավարար իմացություն
- Արևմտահայերենով կրթություն ստացած անձինք, ովքեր լեզվական դժվարություններ ունեն ՀՀ դպրոցներում
Ծրագիրը միտված է ոչ միայն լեզվական գիտելիքների բարելավմանը, այլ նաև միգրանտ երեխաների դպրոցական ծրագրին հեշտ հարմարվելուն և կրթական գործընթացում լիարժեք ներգրավվելուն։
Այս քայլը կարևոր դեր ունի երեխաների սոցիալական ինտեգրման, կրթական հաջողության և մշակութային ինքնության ամրապնդման գործում։