Բուժումը
Գլխացավի դեղահաբերով բուժումը հղիության ժամանակ սահմանափակ է, քանի որ դրանց մեծամասնությունը բացասաբար է անդրադառնում հղիության ընթացքի և պտղի ձևավորման վրա: Բացի այդ, բուժումն անմիջականորեն կախված է գլխացավի պատճառներից:
Ոմանք կարողանում են ազատվել գլխացավից մութ և օդափոխված սենյակում հարմար դիրքով պառկելով: Սովորաբար գլխացավն անցնում է կարճատև քնից հետո:
Գլխացավի դեպքում կարող է օգնել նաև գլխի թեթև մերսումը. Մատների ծարյերով հարկավոր է շրջանաձև շարժումներ անել, միևնույն ժամանակ հարկավոր է առավելագույնս թուլանալ:
Գլխացավի դեմ պայքարի ոչ դեղորայքային մեթոդ է նաև գլուխը տաք ջրով լվանալը:
Բացառված չէ նաև, որ ճակատին, ծոծրակին և քունքերին դրված սառը թրջոցը ևս կարող է օգնել:
Հանգստացնող և ցավազրկող ազդեցություն ունեն անաուխի, մասուրի, երիցուկի թուրմը: Դրանցից կարելի է թեյ պատրաստել: Որոշ դեպքերում, հատկապես ցածր ճնշման դեպքում, կարող է օգնել թունդ քաղցր թեյը:
Գլխացավի դեմ պայքարում կարևոր գործոն է նաև տրամադրվածությունը. պետք է հավատալ, որ գլխացավը հնարավոր է հաղթահարել առանց դեղահաբերի:
Հղիության ընթացքում գլխացավի դեմ կարող են կիրառվել պարացետամոլ պարունակող դեղահաբեր /Էֆֆերալգան, Պանադոլ/, որոնք կախվածություն չեն առաջացնում:
Ասպիրինի և ասպիրին պարունակող այլ դեղամիջոցների /Ցիտրամոն, Ցիտրապար/ օգտագործումը, հատկապես հղիության առաջին եռամսյակում, կարող է հանգեցնել պտղի զարգացման շեղումների, մասնավորապես` սրտի և ստորին ծնոտի: Հղիության վերջին եռամսյակում ասպիրինի օգտագործումը կարող է ծննդաբերության ժամանակ արյունահոսության պատճառ դառնալ:
Անալգինը և մյուս դեղամիջոցները /Բարալգին, Սպազմալգոն, Սպազգան/, որոնց բաղադրության մեջ անալգին կա, բավականին տոքսիկ են և երկարատև օգտագործման դեպքում արյան պաթոլոգիկ փոփոխության են հանգեցնում:
Բոլոր դեպքերում, դեղահաբ ընդունելիս խորհրդակցեք բժշկի հետ:
Անպայման բժշկի դիմեք նաև, եթե.
- Գլխացավը դարձել է մշտական և վերջին շրջանում փոխվել է դրա բնույթը
- Գլուխը ցավում է անգամ առավոտյան` քնից արթնանալուց
- Ցավը կենտրոնացած է գլխի կոնկրետ հատվածում
- Գլխացավն ուղեկցվում է նյարդային համակարգի ախտահարման նշաններով
- Տեսողության, լսողության, խոսքի և շարժողական համակարգի խանգարումներով:
- Ցավը բարձր կամ ցածր զարկերակային ճնշման ուղեկից է:
Կանխարգելումը
Հիմնական քայլերը պետք է ուղղված լինեն գլխացավը կանխարգելելուն:
Նախ և առաջ, հատկապես միգրենի դեպքում, պետք է հասկանալ, թե որ գործոններն են գլխացավ առաջացնում:
Եթե որոշ մթերքներ գլխացավ են առաջացնում, դրանք պետք է բացառել սննդակարգից: Նաև պետք է հետևել, որ միշտ ժամանակին սնվեք, քանի որ քաղցը ևս գլխացավ կարող է առաջացնել:
Գլխացավից խուսափելու համար կարևոր է նաև, որ հղի կինը լիարժեք քնի` ամեն օր նույն ժամին: Այս դեպքում արդեն որևէ օր սովորականից ավել քնելը կարող է գլխացավի պատճառ դառնալ:
Աշխատեք շատ հանգստանալ, զբոսնել մաքուր օդում: Նույն դիրքում երկար աշխատելու դեպքում ամեն 30 րոպեն մեկ վեր կացեք, քայլեք, ձգեք մարմինը:
Խուսափեք աղմկոտ միջավայրից, բարձր ձայներից. Այդ ամենը կարող է գլխացավ առաջացնել:
Գլխացավը կանխարգելելու միջոց է նաև տաք ցնցուղը, ինչպես նաև լողավազանում լողալը:
Նյութն ըստ 9months.ru կայքի
