Մանկատնից երեխայի որդեգրման դեպքերի չեղյալ հայտարարման երեք դեպք է Հայաստանում գրանցվել վերջին տասը տարիների ընթացքում:
«Երեխային որդեգրելուց հետո մանկատուն վերադարձնելը պայմանավորված է եղել այն հանգամանքով, որ ընտանիքը չի հարմարվել երեխային կամ` հակառակը: Եթե մեկ անգամ որդեգրումը չեղյալ է հայտարարվում, տվյալ անձը կամ ընտանիքն այլեւս երեխա որդեգրելու իրավունք չունի»,- ասաց Խաչատրյանը:
Նա նշեց, որ որդեգրումից հետո մանկատունն այլեւս իրավունք չունի հետաքրքրվելու տվյալ երեխայի ճակատագրով: «Եթե որդեգրումը կատարվում է Հայաստանից դուրս, այդ երեխայի հետագա կյանքով զբաղվում է տվյալ երկրի դեսպանատունը, քանի որ որդեգրումը գաղտնիություն է պահանջում: Որդեգրող ընտանիքը ձեռք է բերում նույն իրավունքներն ու պարտականությունները, ինչ կենսաբանական ընտանիքը»,-տեղեկացրեց Խաչատրյանը:
Ամբողջ աշխարհում տարածված է երեխաների եւ նրանց օրգանները վաճառելու երեւույթը, սակայն Խաչատրյանը փաստեց, որ որդեգրումից հետո հայ երեխաների օրգանների վաճառքի դեպք հայաստանյան պրակտիկայում չի գրանցվել: Մինչեւ որդեգրումը բավականին ուսումնասիրություններ են կատարվում որդեգրողի վերաբերյալ, փաստաթղթեր հավաքվում, վկայություններ` եկեղեցուց, հարեւաններից: Եթե բոլոր պահանջները բավարարվում են, միայն այդ դեպքում է կազմակերպվում որդեգրման գործընթացը: