Յուրաքանչյուրն ունի իր սիրելի գույնը, երեխաներն էլ բացառություն չեն:
Փորձեք ուշադրություն դարձնել՝ ձեր փոքրիկն ինչ գույնի մատիտ, ինչ գույնի հագուստ է նախընտրում: Սիրելի գույնը շատ բան կարող է պատմել երեխայի բնավորության մասին: Եկեք պարզենք՝ որ գույնն ինչ է նշանակում:
Կապույտ
Կապույտի երանգները նախընտրող երեխաները բնավորությամբ խաղաղ և հանգիստ են: Նրանք շատ բարեհամբույր են, քմահաճ չեն: Որպես կանոն՝ այս գույնը նախընտրող երեխաներն իրենց տարիքից ավելի հասուն են երևում և ունենում են լայն աշխարհհայացք: Նրանք չեն նախընտրում ակտիվ խաղեր: Մուգ կապույտը նախընտրող երեխաներն ավելի շատ են հակված մելանխոլիայի: Նրանց հաճախ կտեսնեք առանձնացած սեփական մտքերի հետ:
Մանուշակագույն
Մանուշակագույնը նախընտրող երեխաներն ավելի շատ են հակված ստեղծագործելու: Նրանք սիրում են նկարել, պլաստիլինից տարբեր առարկաներ պատրաստել, պարել, երգել: Նրանք արտիստներ են ինչպես կյանքում, այնպես էլ բեմում:
Դեղին
Դեղին գույն են նախընտրում երազողները: Այս երեխաներն ունեն հարուստ երևակայություն, նրանք հաճախ իրականությունից կտրվում են ու ապրում իրենց ստեղծած աշխարհում: Այս գույնը նախընտրողների շրջանում շատ են գործարարներն ու քաղաքական գործիչներն, այնպես որ ձեր երեխան կարող է նման հավակնություններ ունենալ: Այս երեխաները կյանքում տրամադրված են հաղթանակների:
Վարդագույն
Վարդագույնը հիմնականում նախընտրում են աղջիկները և սա խոսում է երեխայի հուզականության մասին: Եթե վարդագույնը նախընտրում են տղաներն, ապա նրանք հեշտ վիրավորվող ու էմոցիոնալ են: Նրանք դժվարությամբ են շփվում մյուս երեխաների հետ: Ծնողները պետք է ուշադրություն դարձնեն երեխային ու նրա պահվածքին: