Դպրոցներում բաց թողնված դասերը կամ կլրացվեն երկար պարապմունքներով կամ դաս կլինի նաեւ շաբաթ օրերին: Կրթության նախարարության առաջարկը պետք է դիտարկեն դպրոցներն ու իրենք որոշում կայացնեն՝ հաշվի առնելով ուսուցիչների նախընտրությունն ու նպատակահարմարությունը:
Ինչ վերաբերում է այս շաբաթվա բացակայություններին, ապա դրանք կհամարվեն հարգելի, այսինքն՝ չեն նշանակվի: Իսկ ընդհանուր առմամբ, բոլոր դպրոցները սկսել են իրենց բնականոն աշխատանքը, մտահոգության առիթ էլ չկա, քանի որ պատշաճ ջեռուցվում են բոլոր շենքերը, բացի Արմավիրի 10 դպրոցներից: ԿԳՆ-ից, սակայն, հավաստիացնում են, որ արդեն տրվել են համապատասխան հանձնարարականներ ՝ խնդիրը լուծելու եւ հաջորդ շաբաթվանից դասերը այդ դպրոցներում եւս վերսկսելու համար:
Փետրվարի մեկից վերսկված դասերից առաջին երկու օրերին բացակայել է աշակերտների շուրջ 20 տոկոսը: ԿԳՆ հանրակրթության վարչության պետ Նարինե Հովհաննիսյանի խոսքով՝ բացակայությունների մեծ մասը պայմանավորված են աշակերտների վատառողջ լինելով կամ հիվանդանալու վախով: Սակայն, ըստ նրա, ծնողները երեխաներին դպրոց ուղարկելիս կարող են չանհանգստանալ վարակվելու կամ մրսելու վտանգի պատճառով. դպրոցներում ջեռուցումը սկսել է ապահովվել դասերի վերսկսելուց դեռ երկու օր առաջ, իսկ բժշկական վերահսկողությունն ուժեղացված է: