2011-ի հունվար-հունիսին Հայաստանում ծնվածների թվաքանակը կազմել է 20102 մարդ, ինչը 2010թ. նույն ժամանակաշրջանի համեմատ նվազել է 927 ծնունդով կամ 4.4 տոկոսով: Այդ մասին նշված է ՀՀ աշխատանքի եւ սոցիալական հարցերի նախարարության կառավարությանը ներկայացրած ժողովրդագրական իրավիճակի բարելավման 2012 թ. ծրագրում:
Նշենք, որ 2010 թ. Հայաստանում գրանցվել էր 44.825 կենդանի ծնված երեխա, որը վերջին 12 տարում ամենաբարձր ցուցանիշն է: Համեմատության համար նշենք, որ 1990 թ. Հայաստանում ծնվել էր 80 հազ. երեխա, սակայն դրանից հետո ծնունդների քանակը կտրուկ նվազում է, 2005 թ. հասնելով իր նվազագույն` 37.5 հազ. մակարդակին: 2007 թ.-ից նկատվում է ծնունդների թվաքանակի աճ, ու միայն այս տարի առայժմ արձանագրվում է նվազում:
Ծնունդների թվաքանակի բարձրացումը մեծապես կախված է ծննդօգնության ծառայությունների բարելավումից:
Քաղաքացիների շրջանում կատարված հարցումները ցույց են տալիս, որ ծննդաբերության հետ կապված հիմնական խնդիրները մնում են մարզերում, իսկ երեւանյան ծննդատները շատ թե քիչ որակյալ ծառայություն են մատուցում: Օրինակ` մարզային ծննդատների մեծ մասում բացակայում են այսպես կոչված ակվարիումները, որոնք կարեւոր են բարդ ծննդաբերություններից հետո: Շատ հաճախ ծնողները ստիպված են լինում հավելյալ ծախսեր կատարել` իրենց երեխային որեւէ հեռավոր մարզից Երեւան հասցնելու համար` ծննդաբերությունների ժամանակ առաջացող բարդությունները հաղթահարելու համար:
Ծննդատներում հաճախակիացել են կեսարյան հատումներով ծնունդները, ընդ որում` ծնողները մեծամասամբ չեն կողմնորոշվում, թե որքանո՞վ վիրահատական միջամտությունը անհրաժեշտ էր եւ անխուսափելի:
Սամվել Ավագյան
News.am