Շուտասելուկներ խոսքի հետ կապված խնդիր ունեցող փոքրիկների համար

*** 

Մեր շունը ութ աշուն տեսավ,

Իսկ աշունը՝ քանի՞ շուն:

Շա՛տ ափսոս, որ շուն չի հաշվում

Աշխարհում ոչ մի աշուն:

***

Մոլոր ակը կլոր ակ է,

Կլոր ա՞կ է մոլորակը:

***

Նույնիսկ հավքերը անտառի

Տարբերում են թառը թառից.

Միշտ էլ իրենց թառին թառում

Ու չեն թառում թառչու թառին:

***

Շնիկը կծան է,

Կածանը՝ փոշոտ:

Շնիկը փոշի է

Բարձրացնում պոչով:

Խառնվել են իրար

Կծան ու կածան...

Կծանը կածան է,

Կածանը՝ կծան: 

***

Մողեսն ասաց մողեսին.

- Պոչս թողի Պողոսին:

Պողոսը չա՜ր տղա է,

Հազիվ թե ինձ խնայեր...

***

- Մռռանը ի՞նչ գործ ունի

Մռայլ ու մութ մառանում:

- Գնա հարցրու մռռանին,

Մռռանն այդ չի մոռանում: 

***

Ոչ քեզ, ոչ ինձ, 

Ոչ քեզ, ոչ ինձ,

Ոչինչ, բացի մկան պոչից,

Մկան պոչից բացի ոչինչ՝

Ոչ քեզ, ոչ ինձ,

Ոչ քեզ, ոչ ինձ: