Բրնձի շիլան միանգամայն օգտակար է հավելյալ սննդի անցած փոքրիկի համար, ունակ է հագեցնելու և վերականգնելու երեխայի ուժերը։
Այն բարենպաստ ազդեցություն է ունենում աղիների աշխատանքի վրա, լրացնում օրգանիզմում երկաթի, A, B վիտամինների ու յոդի պակասը: Բրինձը հարուստ է օսլայով, ինչն օգնում է ստեղծել պաշտպանիչ շերտ և չգրգռել ստամոքսաղիքային տրակտի օղակները։ Նաև չի պարունակում գլյուտեն, որը կարող է չմարսվել վաղ տարիքի երեխաների կողմից ու առաջ բերել սննդային ալերգիա: Բրնձի վիտամինային կազմը նպաստում է փոքրիկի նյարդային համակարգի ու մտավոր զարգացմանը, միկրոէլեմենտներն ապահովում են մազերի, եղունգների, մաշկի առողջությունն ու ոսկրային հյուսվածքի ձևավորումը։ Առաջարկում ենք վերցնել 100 գ բրինձ, 1 դդմիկ, 250 մլ կաթ և 250 մլ ջուր։
Պատրաստման ընթացքը
1․ Մաքրում ենք դդմիկի կեղևը, հեռացնում սերմերը, բաժանում ենք դդմիկը շերտերի:
2․ Բրինձը մանրակրկիտ լվանում ենք, դնում ենք փոքրիկ կաթսայի մեջ, լցնում սառը ջուր և ուղարկում եռման։
3․ Երբ ջուրը եռա, ավելացնում ենք դդմիկի շերտերը, ապա սառը կաթը։ Խառնում ենք զանգվածն ու կրկին հասցնում եռման աստիճանի։
4․ Կափարիչով ծածկում ենք ու եփում 7-8 րոպե։
5․ Շիլան կրակի վրայից վերցնելուց հետո դնում ենք մի կողմ 20-25 րոպե, ապա մատուցում երեխային։
Բարի ախորժակ