Երբ և ինչպես երեխային սովորեցնել միզամանից օգտվել

Եթե մի քանի տասնամյակ առաջ մայրիկները էնտուզիազմով ձգտում էին երեխային միզամանից օգտվել սովորեցնել, որպեսզի ամենօրյա լվացքի քանակը կրճատվի, ապա մեր օրերում մայրիկներն այս հոգսից ազատված են. կան մեկանգամյա օգտագործման տակդիրներ: Սրանք պատճառ են դարձել, որ հաճախ մինչև դպրոցական տարիքը երեխաները դեռ տակդիր են կրում ու միզամանից կամ զուգարանից չեն օգտվում:

Մասնագետները նշում են, որ երեխային միզամանի վրա կարելի է նստեցնել վեց ամսեկանից սկսած, երբ երեխան արդեն կարողանում է ինքնուրույն և ամուր նստել: Միզամանին նստել երեխային պետք է սովորեցնել աստիճանաբար` թե ֆիզիկապես թե հոգեպես նրան չվնասելու համար:

Մասնագետները նշում են, որ 6 ամսեկանից մինչև մեկ տարեկան հասակն այն շրջանն է, երբ երեխան ուսումնասիրում է իր մարմնի հնարավորությունները: Այս տարիքում երեխան սովորում է կառավարել իր օրգանիզմը, այդ թվում և միզելու գործընթացը: Ուստի սա լավագույն տարիքն է երեխային միզամանից օգտվել սովորեցնելու համար:

Միզամանին երեխային վարժեցնելու համար պետք է գործողությունների մի ողջ պլան.

Միզամանը միշտ տեսադաշտում պահեք և քնից առաջ և հետո, կերակրելուց հետո երեխային առաջարկեք օգտվել դրանից
Եթե երեխան չի ուզում նստել միզամանին կամ հրաժարվում է դրանից օգտվել, մի ստիպեք, դա բացասական վերաբերմունք կառաջացնի
Մի բարկացեք երեխայի վրա, եթե միզամանից օգտվել չի ստացվում
Իսկ եթե ստացվում է, գովեք երեխային

Ինչպիսի միզաման ընտրել երեխայի համար

Միզամանի ընտրությունը պակաս կարևոր չէ, քան հարցը, թե ինչպես երեխային միզամանին ընտելացնել:

Պետք չէ գնել երաժշտական կամ ձայնային էֆեկտներով միզաման, սրանք կարող են ռեֆլեքս ձևավորել և հետագայում երեխան, անկախ գտնվելու վայրից, այդ ձայները լսելիս կմիզի:
Խուսափեք նաև շատ վառ գունավորում ունեցող միզամաններից, երեխան դա նախ և առաջ որպես խաղալիք կընկալի:
Միզամանը աթոռի, բազկաթոռի նման չպետք է լինի, այլապես հետագայում երեխան կարող է միզել նաև աթոռի վրա նստելիս:
Կարևոր է նաև միզամանի չափսը: Երեխային հարմար չէ օգտվել իր համար փոքր կամ մեծ միզամանից:

Նյութն ըստ baby.ru և 1kid.ru կայքերի