Փոքրիկի կյանքի առաջին վեց ամիսներին նրա միակ սնունդը մայրական կաթն է կամ արհեստական կաթնախառնուրդը: Փոքրիկի քաշի ավելացմամբ, նրա ընդհանուր վիճակով, կղանքի և միզարձակման քանակությամբ կարելի է որոշել`արդյոք նրա սնունդը բավարար է: Փոքրիկին կարելի է կշռել բժշկին այցելության ժամանակ կամ տանը:
Ինչպե՞ս որոշել փոքրիկի քաշի ավելացումը
Որպես հիմք պետք է ընդունել ոչ թե քաշը, որով փոքրիկը ծնվել է, այլ նրա բժշկական քարտում նշված նվազագույն քաշը, որտեղ հաշվարկված է նաև ծնվելուց հետո քաշի ֆիզիոլոգիական կորուստը: Որպես կանոն, բավարար է փոքրիկին շաբաթական մեկ անգամ կշռելը, իսկ ութ շաբաթականից հետո արդեն ամսական մեկ անգամ կշռելը լրիվ բավարար է:
Ինչպե՞ս վարվել, եթե փոքրիկը դանդաղ է քաշ հավաքում
Հարկավոր է որոշել, թե արդյոք ճիշտ է կազմակերպվում փոքրիկի սնուցումը`արդյոք նա բավարար հաճախականությամբ է սնվում (օրական առնվազն 8-12 անգամ), արդյոք կրծքի մոտ մնում է այնքան, որքան ուզում է, արդյոք ճիշտ կերպով է նրան կուրծքը մատուցվում և որքանով է ճիշտ ծծում կաթը: Խնդիրների մեծամասնությունը մայրիկը կարող է լուծել ինքնուրույն կամ էլ կրծքով կերակրման մասնագետի աջակցությամբ: Եթե պարզվի, որ լրացուցիչ սննդի կարիք կա, մանկաբույժը համապատասխան նշանակումներ կանի:
Արդյո՞ք պետք է փոքրիկին կշռել կերակրելուց առաջ և հետո
Ո՛չ, պետք չէ: Կարևոր չէ, թե որքան կաթ է փոքրիկը ստացել մեկ կերակրման ընթացքում, այլ կարևոր է, թե որքանն է նա յուրացրել: Փոքրիկն ամեն անգամ կարող է տարբեր քանակությամբ կաթ ուտել, կամ սնվելիս կարող է միզարձակում տեղի ունենալ, ինչը կազդի քաշի վրա, եթե որոշեք սնվելուց առաջ և հետո կշռել նրան: Իրականում շաբաթական մեկ անգամ կշռելը բավարար է: Իսկ եթե կասկածներ ունեք քաշի վերաբերյալ, նրան կշռեք նույն կշեռքի վրա, նույն հագուստով, շաբաթը մեկ պարբերականությամբ:
Որքան պետք է ավելանա փոքրիկի քաշը
Կյանքի առաջին չորս-հինգ ամիսներին նորմալ է համարվում քաշի ավելացումը շաբաթական 125-215 գրամով: Դրանից հետո քաշի ավելացումը դանդաղում է, քանի որ փոքրիկը սկսում է ակտիվ շարժվել:
Արդյո՞ք վտանգավոր է քաշի ավելցուկը նորածինների մոտ
Եթե փոքրիկը մեծ տեմպերով է քաշ հավաքում, ու նրա ցուցանիշները կտրուկ տարբերվում են ընդունված նորմերից, ցանկալի է մանկաբուժի հետ խորհրդակցել ու նաև փոքրիկին հետազոտության տանել. հնարավոր է, որ նրա մոտ առկա լինեն էնդոկրին, սիրտանոթային համակարգի կամ երիկամային հիվանդություններ:
Նյութը՝ ըստ mama.ru կայքի
