Արմեն Մուրադյան. Տարեկան 200-300 հղի կանանց համար բժիշկները կյանքի ու մահվան կռիվ են տալիս

«Հայաստանում տարեկան 18 հազար հղիության պաթոլոգիա է գրանցվում, որոնցից 200-300 դեպքերը կյանքին ուղիղ վտանգ սպառնացող վիճակներ են»,-անդրադառնալով վերջերս ծննդկանների մահվան դեպքերին՝  ասաց առողջապահության նախարար Արմեն Մուրադյանը՝ ավելացնելով, որ «յուրաքանչյուր նման դեպք մեզ համար, հասարակության համար ողբերգություն է, չենք դիտարկում այն որպես վիճակագրություն:

Նախարարի խոսքով՝ փաստացի թվերը, սակայն, վկայում են այն մասին, որ դեպքերը նվազում են. «սա վիճակագրություն է, որի հետ մենք չենք կարող որեւիցե կերպ հաշվի չնստել»: Արմեն Մուրադյանի խոսքով՝ մայրական մահացությունն ամբողջ աշխարհում պետական լրջագույն խնդիրներից մեկն է, եւ այն Հայաստանում առողջապահական համակարգի եւ կառավարության ուշադրության ներքո է: Նախարարի տվյալներով՝ մայրական մահացության ցուցանիշը  2000 թվականին եղել է 71,  եւ տարեկան գրանցվում էր շուրջ 60 մայրական մահացության դեպք: «Մշակվեցին մի քանի պետական ծրագրեր,  որոնցից էր 15 տարեկան աղջիկների դիսպանզերիզացիան, ընտանիքի պլանավորումը, բայց սրա դեմ լայն հասարակական ընդվզում սկսեց, որը, սակայն, տարիների ընթացքում ապացուցեց իր կենսունակությունն ու անհրաժեշտությունը: Ծննդօգնության սերտիֆիկատ ներդրվեց, կազմակերպվեցին արագ արձագանքման խմբեր, կրիտիկական դեպքերի վերլուծություն, չափորոշիչներ եւ գործելակարգեր մշակվեցին: Այդ 71 ցուցանիշն իջել է 18,6 դեպքի: Ի դեպ, ԱՊՀ երկրներում այդ ցուցանիշ  29,3 է կազմում: Հայաստանում անցյալ տարի 8 դեպք  է գրանցվել, այս տարի՝ 7 ամիսների ընթացքում, 5 դեպք:  Աշխարհում որեւէ երկիր չկա, որին հաջողվում է այդպիսի ցուցանիշ ունենալ: Արեւմտյան Եվրոպայում այդ ցուցանիշն իջնում է մինչեւ 5, Արեւելյան Եվրոպայում այդ ցուցանիշը մոտ 16 է»,-ասում է նախարարը՝ ավելացնելով, որ վերջին երկու չարաբաստիկ դեպքերը պետք է քննարկվեն իրավապահ մարմինների կողմից,  եւ հիմնական սկզբունքը լինելու է անաչառությունը, արհեստավարժությունն ու հետեւողականությունը:

Աղբյուրը՝ aravot.am

հղիություն հղիներ մայրական մահացություն արմեն մուրադյան առողջապահության նախարար