Հարցերին պատասխանում է Շենգավիթ բժշկական կենտրոնի նորածինների ինտենսիվ թերապիայի բաժանմունքի նեոնատոլոգ Լուսինե Գրիգորյանը:
Ինչի՞ց է առաջանում լոշտակությունը
Լոշտակության առաջացման երկու տարբերակ կա`
1 ֆունկցիոնալ լոշտակություն, որն առաջանում է մկանի ոչ ճիշտ կպման հետևանքով:
2 բնածին, ներարգանդային կյանքում ձևավորվող լոշտակություն, երբ աճառի երկու թմբիկները չեն զարգանում, ինչի հետևանքով ականջի որոշ մասերը խախտված են լինում և փռված տեսք են ունենում ու ավելի մեծ են երևում:
Ինչպե՞ս է շտկվում
Շտկումը կատարվում է հիմնականում վիրահատական միջամտությամբ: Օտոպլաստիկայի (ականջների պլաստիկա) ժամանակ, եթե հնարավոր է, մկանն է կտրվում և ճիշտ տեղից ամրացվում: Այդպես ականջի չափսը փոքրանում է և մոտեցվում գլխին:
Ո՞ր տարիքից է կարելի վիրահատական միջամտություն
Վիրահատական միջամտություն կատարվում է 6 տարեկանից, երբ աճառն ամբողջովին ձևավորված է լինում և հնարավոր է կատարել օտոպլաստիկա: Ռիսկային տարիք է այն առումով, որ երեխան սկսում է դպրոց գնալ և հոգեբանական խնդիրներ կարող են առաջանալ, ուստի այդ տարիքում վիրահատելը ճիշտ է:
Որքանո՞վ է հավանական հետվիրահատական բարդությունների առաջացումը
Օտոպլաստիկան համարվում է թեթև վիրահատություն, որի դեպքում բարդություններ քիչ են հանդիպում: Հնարավոր է լինի վերքային մակերեսի բորբոքվածություն, որը ևս հազվադեպ է հանդիպում:
