Առհասարակ նորածնին բարուրել խորհուրդ չի տրվում, իսկ ամուր բարուրելն առավել քան վտանգավոր է: Ինչու՞: «Նախևառաջ, ծագում է հիպոթերմիայի վտանգ:
Երեխայի մարմնի և տակաշորի միջև օդի շերտ գրեթե չի մնում, որը թույլ չի տալիս պահել ջերմությունը: Մարմնի սեղմված հատվածներում նվազում է արյան շրջանառությունը, և դա հանգեցնում է տվյալ մասերում ջերմաստիճանի անկմանը»,- նշում է բժիշկ-նեոնատոլոգ, նորածնային սիմուլյացիոն կենտրոնի մարզիչ Տաթևիկ Ավանեսյանը:
Նրա խոսքով` ամուր բարուրելը նվազեցնում է նաև թոքերի րոպեական ծավալը` ստոծանու շարժումների սահմանափակման հետևանքով, խանգարում կրծքով սնուցմանը: Փոքրիկը չի կարողանում շարժել գլուխը և բաց անել բերանն այնպես, որ ամուր ամրակցվի կրծքին: Նա լինում է քնկոտ, ինչը լակտացիայի վաղ շրջանում խոչընդոտում է նորմալ կաթնարտադրության հաստատմանը:
«Պինդ բարուրված վիճակը բացասաբար է անդրադառնում նյարդային համակարգի զարգացման վրա, որովհետև բալիկի վերջույթների շարժումները սահմանափակվում են»,- ընդգծում է մասնագետը: Հետևաբար նորածնին պետք է հագցնել ազատ, հատկապես վերջույթները` օգտագործելով բամբակյա հագուստ:
Աղբյուր` Տաթևիկ Ավանեսյանի ֆեյսբուքյան էջ