Ամանորի հրաշք և այդքան անհրաժեշտ աջակցություն` Հայաստանի առավել կարիքավոր երեխաներին

Լուրեր

Ամանորի տոներին ընդառաջ «Վորլդ Վիժն Հայաստան» միջազգային բարեգործական կազմակերպությունը, նախաձեռնում է նվիրատվական ակցիաներ, որոնք կօգնեն հոգալ Հայաստանում աղքատության և կարիքի մեջ ապրող երեխաների կենսական կարիքները, ինչպես նաև պարգևել նրանց  ամանորյա նվերներ և տոնական տրամադրություն:

«1 օր` 1 նվեր»  ակցիան, որը մեկնարկել է դեկտեմբերի 1-ից, նպատակ ունի գումար հանգանակել՝  Նոյեմբերյանի, Ամասիայի և Ճամբարակի գյուղական համայնքներում ապրող 30 երեխայի Ամանորի նվերներ մատուցելու համար: 1 նվերի փաթեթն արժե 10000 դրամ, և այն ներառում է ինչպես ավանդական քաղցրավենիք, այնպես էլ երեխայի ցանկությանն ու կարիքին համապատասխան խաղալիք:

Նվիրատվությունները կատարվում են www.donate.am կայքի միջոցով:

Ամեն օր «Վորլդ Վիժնի» ֆեյսբուքյան էջում տեղադրվում է մեկ երեխայի կյանքի և երազանքների մասին պատմող գրառում:

Սրան կից, դեկտեմբերի 13-ից Երևանի առևտրի կենտրոններից մեկի հետ համատեղ «Վորլդ Վիժնը» սկսում է «Հավաքենք ջերմության փազլը» նախաձեռնությունը: Մոլերից մեկում տեղադրվելու է հսկայական փազլ, որը կհավաքեն մոլի այցելուները՝ գնելով փազլի մասնիկները և տեղադրելով դրանցից յուրաքանչյուրն իրենց տեղում: Ակցիայի միջոցով հանգանակված դրամական միջոցները թույլ կտան տաք հագուստով ապահովել ավելի քան 70 երեխայի:

Տոնական գնումներին զուգահեռ «Վորլդ Վիժնը» հրավիրում է նաև մասնակցել այս ակցիային և տաք հագուստի հետ մեկտեղ ջերմ ու բարի մաղթանքներ ուղարկել կարիքի մեջ ապրող մանուկներին: 

 

Գովազդ