Հայաստանում մանկական մահացության ցուցանիշն ամենացածրն է ԱՊՀ-ում

Առողջապահության նախարարությունը ծննդօգնության ոլորտում իրականացված ծրագրերի արդյունքում մի շարք հաջողություններ է գրանցել: «Արմենպրես»-ի հաղորդմամբ, ինչպես հոկտեմբերի 20-ին Աղվերանում լրագրողների հետ հանդիպմանը նշեց ՀՀ ԱՆ Մոր եւ մանկան առողջության վարչության պետ Կարինե Սարիբեկյանը, իրականացված ծրագրերի արդյունքում հղիների վաղ հաշվառման ցուցանիշը բարձրացվել է իսկ մայրական մահացության դեպքերն էլ կրճատվել են:

«2010 թվականին վաղ նորածնային մահացության դեպքերի կրճատում է գրանցվել տասը տոկոսով: Եթե 2009-ին մայրական մահացության 13  դեպք է գրանցվել, ապա 2010-2011 թվականների մայրական մահացության 3-ական դեպք է գրանցվել»,-ասաց նա: Սարիբեկյանի խոսքով` մանկական մահացության գրանցման գործընթացում օրենսդրական փոփոխությունները թույլ են տվել մանկական մահացությունների հաշվառում իրականացնել: «Շատ հաճախ երեխաների մահը սուբյեկտիվ պատճառներով չեն գրանցում: Մենք շուրջ 56 տոկոս մանկական մահացության չգրանցված դեպք ունեինք: Մանկական մահացության առումով մեր ցուցանիշը ամենաբարենպաստն է ԱՊՀ երկրների համեմատ»,-ասաց նա:

Մոր եւ մանկան առողջության վարչության պետը, անդրադառնալով նախարարության կողմից իրականացված ծրագրերին, նշեց, որ մի շարք ծրագրերի իրականացման արդյունքում միայն փորլուծային  հիվանդությունները կրճատվել են  70 տոկոսով, շնչառականը` 50  տոկոսով: Հաջող իրականացվել է նաեւ իմունիզացիայի ծրագիրը:

Մոր եւ մանկան առողջության ոլորտում Կարինե Սարիբեկյանը հատկապես առանձնացրեց  բյուջետային ֆինանսավորման, մարզերում եւ մայրաքաղաքում առողջապահության ռեսուրսների անհավասարաչափ բաշխման հետ կապված խնդիրները:

Անդրադառնալով առաջիկա ծրագրերին` նա նշեց, որ մարզային յոթ հիվանդանոցներ առաջիկայում կվերակառուցվեն եւ կհագեցվեն ժամանակակից սարքավորումներով: