Sidebar

Սովորեցրեք փոքրիկին կարդալ նկարն ու զարգացնել խոսքը

Ցույց տվեք երեխային որևէ նկար, ցանկալի է, որ նկարում պատկերված լինեն մարդիկ, կենդանիներ, իրադարձություններ: Խնդրեք երեխային խոսել նկարի մասին, մանրամասն պատմել, թե ինչ է այնտեղ պատկերված:

Որպեսզի օգնեք, որ մանրամասն պատմի նկարը, կարող եք նաև հուշող հարցեր տալ փոքրիկին: Օրինակ`

  • Ի՞նչ է տեղի ունենում նկարում:
  • Ովքե՞ր են, ի՞նչ են անում:
  • Օրվա ո՞ր ժամն է: Ինչպե՞ս իմացար:
  • Ի՞նչ է տեղի ունեցել նկարում պատկերված պահից առաջ:
  • Իսկ ի՞նչ կարող է տեղի ունենալ հետո:

 

Այս և նման այլ հարցերը, որոնք կբխեն կոնկրետ նկարներից, կօգնեն երեխային ավելի մանրամասն խոսել, սովորել նկարագրել տեսածը:

Կարող եք օգնել երեխային, որ ավելի շատ ածականներ և մակբայներ օգտագործի նկարում պատկերվածը նկարագրելու համար:

«Կարդա նկարը» խաղի մեկ այլ տարբերակ էլ կարող եք կիրառել: Վերցրեք Ձեր ընտանեկան որևէ հանդիսություն կամ իրադարձություն պատկերող նկար, որին երեխան ականատես կամ մասնակից է եղել: Օրինակ, նկարում կարող է պատկերված լինել փոքրիկի ծննդյան խնջույքը:

Խնդրեք նրան պատմել այն ամենը, ինչ հիշում է, Դուք էլ, բնականաբար, օգնեք հուշող հարցերով.

  • Ի՞նչ եղավ:
  • Ովքե՞ր էին եկել:
  • Ի՞նչ նվերներ էին քեզ բերել:
  • Ինչպե՞ս էիր քեզ զգում:

Այս տիպի խաղերը կօգնեն Ձեր փոքրիկին զարգացնել հիշողությունը, ունենալ գեղեցիկ խոսք ու հարուստ բառապաշար, ինչպես նաև տեսածը բառերով արտահայտելու կարողություն: