Մանկապարտեզի մասին բանաստեղծություն

Այժմ ճամփան լավ գիտեմ,

Մենակ գնում եմ արդեն,

Դուրս եմ գալիս մեր բակից,

Անցնում եմ այս պուրակից,

Ծանոթ փողոցն եմ անցնում,

Այստեղ շենք են կառուցում,

Չեմ սխալվել, քիչ հեռվում

Հյուրանոցն է երևում: 

Հյուրանոցի հենց մոտով,

Երկար ձգվող լայն մայթով

Մի քիչ գնում եմ առաջ,

Ահա այգին մեր կանաչ:

Կանաչ այգու հենց դիմաց

Գեղեցիկ շենք երևաց.

Իմ սիրելի շենքն է սա,

Մանկապարտեզ ես հասա:

Հեղինակ՝ Սուրեն Մուրադյան