Կարճ բանաստեղծություններ խոսել նոր սովորած փոքրիկների համար

***

Արդեն մեծ եմ ես գիտե՞ք,

Էլ ինձ փոքրիկ չկարծե՛ք:

Ոտքիս ծայրին թե կանգնեմ,

Մեծ սեղանին կհասնեմ: 

***

Ծափիկ, ծափիկ, ծափ անեմ,

Իջնեմ բակում խաղ անեմ,

Մի փունջ ծաղիկ հավաքեմ,

Բերեմ մայրիկիս նվիրեմ։ 

***

Սիրում եմ քեզ հայոց լեզու,

Մայրիկիս պես անուշ ես դու,

Քեզնով եմ ես հպարանում

Կարդում, գրում, արտասանում։ 

***

Ծիտի՛կ, ծիտի՛կ, մո՛տ արի,

Քեզ տամ կորեկ ու գարի,

Չվախենա՛ս, չթռչե՛ս,

Ես չեմ ուզում բռնել քեզ: 

***

Ձի-ձի, փայտե ձի,

Մեր դռանը կապեցի,

Կարմիր գույնով ներկեցի,

Ով որ ունի այսպես ձի,

Թող գա ինձ հետ նա մրցի: 

***

Ես վառվռուն վարդն եմ ալ,

Քնքուշ, բուրավետ ծաղիկ եմ գարնան,

Բոլորից շատ է սիրում ինձ մարդը,

Ես եմ բնության ծիծաղն ու զարդը: 

***

Գարուն եկավ, արտը ծլեց,

Ծիտը ծառին անուշ երգեց,

Մանուշակը գլխիկն հանեց,

Գարնան գալը մեզ ավետեց: 

***

Բը՛զ, բը՛զ, բըզբըզան,

Բզեզն եկավ տըզտզան,

Եկավ-ընկավ թակարդը,

Նրան բռնեց չար սարդը: 

***

Մայրիկ, ես քեզ

Շատ-շատ եմ սիրում:

Թե չես հավատում`

Նայիր աչքերիս,

Աչքերիս մեջ

Դու ես երևում: