«Կրծքով կերակրելուց անմիջապես հետո կարելի՞ է պառկեցնել երեխային»․ «Իմ փոքրիկ»-ի ընթերցողների այս և այլ հարցերի պատասխանում է մանկաբույժը

Հարց/Պատասխան

«Մուրացան» համալսարանական հիվանդանոցի մանկաբույժ Գոհար Մարգարյանը պատասխանել է «Իմ փոքրիկ»-ի ընթերցողների հարցերի հերթական խմբաքանակին։

Անուն՝ Սվետա

Հարց՝ Բարև Ձեզ:  ԿԿ մայրիկ եմ, բալիկս հրաժարվում է թե՛ կրծքի կաթից, թե՛ արհեստականից: Արդեն 3 օր է՝ նորմալ չի ուտում: Ինչպե՞ս վարվեմ, ի՞նչ խորհուրդ կտաք:

Պատասխան՝ Ընդամենը պետք է լինեք համբերատար և բալիկին հաճախ մոտեցնեք կրծքին:  

 

Անուն՝ Գոհար

Հարց՝ Հարգելի՛ բժիշկ, երեխաս 6 ամսական է: Երբ լաց է լինում, արցունք չի հոսում։ Արդյո՞ք դա նորմալ է:

Պատասխան՝ Անհանգստանալ պետք չէ, քանի որ տարբեր երեխաների մոտ արցունքը տարբեր ժամանակ է լինում: Շատերի մոտ կարող է արցունքագեղձը գործել վեց ամսականից հետո:  

 

Անուն՝ Լիլյա

Հարց՝ Բարև Ձեզ։ Երեխաս 8 ամսական է, ինքնուրույն չի նստում, փորիկի վրա պառկել չի սիրում և դժվարությամբ է մեջքից փորիկի վրա պտտվում։ Սա վտանգավո՞ր է։ Նախապես շնորհակալ եմ։

Պատասխան՝ Ութ ամսականում փոքրիկներն արդեն պետք է ինքնուրույն նստեն, մեջքից պտտվեն փորիկի վրա և հակառակը: Սակայն շատ անհանգստանալու կարիք չկա, հարկավոր է դիմել նյարդաբանի:     

 

Անուն՝ Վարդուհի

Հարց՝ Տղաս վեց տարեկան է, հաճախակի ունենում է փորացավ: Ամեն փորացավի ժամանակ կղանքի մեջ նկատում եմ արյուն: Երկու ամիս առաջ ստացել է բուժում՝ լյարդի բորբոքվածության և թեքվածության համար։ Մեկ ամսվա բուժումից հետո սոնոգրաֆիան և  արյան ընդհանուր անալիզը ցույց են տվել, որ բուժումն արդյունավետ է եղել: Խնդրում եմ ասել՝ ինչի՞ հետևանք կարող են լինել փորացավն ու արյունը:

Պատասխան՝ Հարկավոր է դիմել մանկաբույժի, պարզել կղանքում արյան առկայության բուն պատճառը: Տվյալ դեպքում միայն լյարդի բորբոքվածությունը և թեքվածությունը չեն, որ արյան պատճառ կարող են հանդիսանալ:   

 

Անուն՝ Լիանա

Հարց՝ Բարև Ձեզ: Կարելի՞ է կրծքով կերակրելուց հետո անմիջապես պառկեցնել երեխային: Վտանգավոր չէ՞: Նշեմ, որ գիշերային ժամերին փոքրիկը քնում է հենց կերակրման ընթացքում:  

Պատասխան՝ Ցանկալի է կերակրելուց հետո որոշ ժամանակ պահել երեխային ուղղահայաց դիրքով: Սակայն եթե կերակրման ժամանակ բալիկը քնում է, անհրաժեշտ է քնեցնել գլուխը բարձր, կիսաթեքված դիրքով:  

 

Անուն՝ Ցողիկ

Հարց՝ Բարև Ձեզ:  Աղջիկս 13 տարեկան է, ձեռքերի ափերն առատորեն քրտնում են։ Որո՞նք են պատճառները և ինչպե՞ս բուժել։

Պատասխան՝  13 տարեկանում ափերի առատ քրտնարտադրությունը կարող է լինել վեգետատիվ ակտիվության հետևանք: Կարող է նաև ընտանեկան նախատրամադրվածություն ունենալ: Ցանկալի կլինի արյան մեջ որոշել վիտամին D-ի քանակը, որովհետև երբեմն դրա ցածր քանակն է գերքրտնարտադրության պատճառ դառնում: 

 

 

 

 

 

Անուն՝ Անահիտ

Հարց՝ Երեխաս 24 օրական է, մանկաբույժը վիտամին D չի նշանակել։ Արդյո՞ք պետք է տալ հիմա։ Եթե այո, ապա ի՞նչ չափաբաժնով։ Կանխավ շնորհակալություն։

Պատասխան՝ Վիտամին D տալը լավ կլինի սկսել կյանքի առաջին օրերից, պրոֆիլակտիկ կարգով տրվում է 500 միավոր, այսինքն՝ մեկ կաթիլ: 

 

 

 

 

Անուն՝ Լուսինե

Հարց՝ Բարև Ձեզ: Ծնողներիս մոտ առկա է մտավոր հետամնացություն, սակայն ինձ մոտ ամեն բան կարգին է։ Այժմ ցանկանում եմ ամուսնանալ: Ուզում եմ իմանալ՝ հնարավո՞ր է, որ ապագա երեխաներս լինեն մտավոր հետամնաց: Կանխավ շնորհակալ եմ։

Պատասխան՝ Պետք է հաշվի առնեք՝ ինչ ծագում ունի դա: Եթե կրում է գենետիկ բնույթ, ուրեմն հավանական է՝ ապագա սերնդում էլ ի հայտ գա մտավոր հետամնացություն:  Բայց եթե ձեռքբերովի է, մտածելու առիթ չկա: