Առողջ սնունդն առողջ հղիության կարևոր նախապայմաններից է

Քանի որ  պտուղը սննդանյութերն ստանում է մոր արյան միջոցով, կարևոր է հղիության ժամանակ պահպանել ռացիոնալ և ճիշտ սննդակարգ: Եթե դուք մինչև հղիությունը սնվել եք բալանսավորված, կնոջը մնում է միայն որոշ շտկումներ անել: Ամենօրյա օգտագործվող սնունդը  պետք է ավելացվի 500 կալորիայով, որը կկազմի 2500 կալորիա: Հղիության ժամանակ երկու անգամ ավելանում է պահանջը սպիտակուցների նկատմամբ: Անհրաժեշտ է նաև կալցիում, որը մասնակցում է ոսկրային հյուսվածքի և ատամների ձևավորմանը: Եթե սաղմը չի ստանում կալցիումի բավարար քանակություն, սկսում է վերցնել մոր պաշարից` այդպիսով դարձնելով մոր ոսկորներն ու ատամներն ավելի փխրուն:

Շատ կարևոր է նաև երկաթի ընդունումը, ինչը էական է հեմոգլոբինի համար, պիգմենտի, որը մտնում է արյան կարմիր բջիջների մեջ: Պտղի արյան ծավալը և բաղադրությունը կախված է մոր սննդակարգում երկաթի քանակից: Երկաթի և վիտամին B12-ի պակասը կարող է հանգեցնել հղի կնոջ մոտ անեմիայի` սակավարյունության առաջացմանը: Ի դեպ, սուրճը և թեյը դժվարացնում են երկաթի յուրացումը, հետևաբար պետք է նվազեցնել դրանց օգտագործումը: Շատ էական է նաև վիտամին D-ի առկայությունը, որը կանխում է պտղի մոտ ռախիտի առաջացումը: Հետևաբար հղիին խորհուրդ է տրվում շատ ժամանակ անցկացնել մաքուր օդում, արևի լույսի տակ, որը և փոխանցում է վիտամին D-ն:

Ֆոլաթթուն ևս խիստ կարևոր է: Այն  կանխում է նյարդային խողովակի արատների առաջացումը: Դրա համար հղիության առաջին 3 ամիսների ընթացքում այն պետք է ներառել ռացիոնի մեջ: Ինչպես նաև բժշկի նշանակմամբ հղին կարող է ընդունել ֆոլաթթվի հաբեր (օրը`0,4 մլգ):

Ֆոլաթթվով հարուստ են`

սպանախը, կաղամբը, կանաչիները, կանաչ լոբին, ծաղկակաղամբը

Երկաթով հարուստ են`

մսի ոչ ճարպոտ տեսակները` լյարդ, երիկամ, ինչպես նաև կանաչեղենը, լոբին, սիսեռը

Կալցիումով հարուստ են`

կաթնամթերքը` կաթ, պանիր, մածուն, և ձավարեղենի որոշ տեսակներ

Վիտամին D-ով հարուստ են`

ճարպոտ ձուկը, ձուն, կարագը, մարգարինը:

Աղբյուրներ` «Գիրք ծննդոց», հեղինակներ`

Ռազմիկ Աբրահամյան, Գայանե Ավագյան «Առողջ հղիություն»`

ըստ եվրոպացի և ամերիկացի հայտնի մասնագետների

բազմանուն գիտական հրատարակությունների