Հոր և մանկան շփման առանձնահատկություններն ըստ տարիքի

Ամեն ինչ սկսվում է հղիությունից

Ձեր ապագա փոքրիկի հետ շփումը ցանկալի է սկսել դեռ հղիության փուլից, երբ փոքրիկը մայրիկի փորիկում է: Հղիության 6-7-րդ ամսում  փոքրիկն արդեն ընկալում է շրջակա միջավայրի ձայները, և նրա համար ավելի շատ լսելի է տղամարդկային ձայնը: Ուստի, մի կողմ վանեք միտքը, որ փորի հետ խոսելը ծիծաղելի է թվում, ձեռքերը դրեք Ձեր կնոջ փորին, կռացեք դեպի այն ու խոսեք փոքրիկի հետ: Անմիջապես կզգաք, թե ինչպես է փոխվում փոքրիկի ակտիվությունը`որպես արձագանք Ձեր խոսքերին:

Երբ փոքրիկն արդեն ծնվել է

Փոքրիկի լույս աշխարհ գալուց հետո ընտանիքում գրեթե ամեն ինչ փոխվում է: Փոքրիկի խնամքը մայրիկից շատ ժամանակ է պահանջում: Սակայն պետք է հաշվի առնել, որ մայրիկին հարկավոր է նաև  ժամանակ առ ժամանակ զբաղվել իրենով: Հենց այդ պահին օգնության եք հասնում Դուք, գրկում եք փոքրիկին և խոսում նրա հետ: Մինչև փոքրիկի ծնվելը Ձեր կնոջ փորիկի հետ զրույցների շնորհիվ նա այժմ կհիշի Ձեր ձայնը և չի լացի Ձեր գրկում, իհարկե, եթե քաղցած կամ թաց չէ:

Շատ հայրիկներ վախենում են  գրկել փոքրիներին: Նման պարագայում խնդրեք Ձեր կնոջը կիսվել Ձեզ հետ իր հմտություններով: Շուտով կհասկանաք, որ վախենալու ոչինչ չկա, և Դուք էլ կարող եք գրկել ու սիրել փոքրիկին առանց նրան վնասելու:

Փոքրիկն արդեն 1-3 տարեկան է

Այս տարիքում ավելի դժվար է խոսել երեխայի հետ, քանի որ նրա խոսքը դեռևս գտնվում է զարգացման փուլում և այնքան էլ հստակ չէ: Այնուամենայնիվ,  խոսեք նրա հետ, որքան շատ խոսեք, այնքան շուտ կզարգանա խոսքը:

Փոքրիկների ժամանցն հայրիկների հետ բոլորովին այլ է, քան մայրիկների հետ. hայրիկները երեխաներին նստեցնում են վզին, մեկ օդ բարձրացնում, մեկ ցած իջեցնում, ինքնաթիռ-ինքնաթիռ են խաղում ու այդպես շարունակ: Նման շփումը փոքրիկի հետ շատ կարևոր է, քանի որ նա այսպես սովորում է զարգացնել տարբեր տիպի հարաբերություններ:

Երեխան, բացի մորից պետք է շփվի հոր, տատիկի, պապիկի և այլ անձանց հետ: Հիշեք, որ յուրաքանչյուր երեխա իրավունք ունի նոր հարաբերությունների, որոնք էլ իրենց հերթին ապագայում կօգնեն նրան այլ երեխաների, ուսուցիչների և շրջապատող  անձանց հետ մտերմանալուն:

Շատ կարևոր է երեխային պատմել նաև Ձեր գործերի ու պարտականությունների մասին: Դա կօգնի փոքրիկին հասկանալ, որ ընտանիքից այն կողմ  մեծ աշխարհն է, որտեղ բոլորն ունեն պարտականություններ:

Շարունակելի

Նյութն ըստ ya-roditel.ru  կայքի